من قصائدي : ياقــــــــــــــــــــــــــــوتة ...

ياقوتة بتدفق موية
نافورتك
أحاسيس و عواطف
صبت في القلب أنهار
هبت في الجوه عواصف
مرقت في مسامك
حنطة و يقطين
زيتونة و زيت
زينه و فاكهه
سالت أنهار من عسل و لبن
و النشوة اختلطت بالوجدان
و رنت اوتار الأعصاب
و بقينا اغراب
و جينا قراب
و الجو مخمور و العطر انداح
و ظهرت ألوان
مزجت ألحان
و حكم ....و لطائف
ألفاً إلا خمسين
مذ نادى عليك الهاتف
صبرتي الصبر سنين
و العود الحرَق ...قام اخضرَ
ويوم رنَ الهاتف طالت بثماره العزة
و اتحدى يغازل و يلاطف
في مرايتك ...كملتي ملامحو
قد بانت فيك القسمات
و اخضرَ ـ وبكلام معسول ـ
كان ردَ عليك الهاتف
عشمك مدخور ...في الجب أسرار
و حكاوى اطفال ....حبوبة القلب العاطف
الدنيا ازدانت ...و الغيم ضجَ ...ولول متعاطف
بالنور البقَ...والبرق الشعَ
و كانت قصة فاطمة القصب الأحمر
و الجلابــة
الشافو الفجر
و كانوا اتوضوا قبل شوية ....و صلوا جماعة
و لمن مرت فاطمة و سألت
كان ايديهم في سماالله
و كان عينيهم تبرق ضو
و في سما الله
كان الباب مفتوح ...و بيهاتف
و يا ود النمير ....اظهر
يا راكب البعير ...اظهر
بقت شمسك عصير .......اظهر
على الفرس اللبن ....اظهر
ثنياتك بدن ........اظهر
و بالسيف المتين ......اظهر
فداك شوق الحنين ......اظهر
و يا فاطمة القصب .....اخضر
و يا فاطمة القصد .......اخضر
و يا فاطمة القصر........اخضر
و با فاطمة القليب ......اخضر
و يا فاطمة النصيب ......اخضر
و يا فاطمة الدريب .......اخضر
و يا فاطمة الحبيب ........اخضر
وصل سكتنا ....مشوار الحنين آلف
و في احلامنا
مدن ...ديمومة بالريد و الامان قامت
و على خضرة ضفافها البان
سجت ليلتنا ....و عيون نامت
و في امالنا
وصلنا مشوار الملايين ...خطوة اذا دامت
غناوى النرجس المسحور
ندا الزمن القديم سالف.....
كوني حركة الزمن الواقف
و كوني نضارة العرق الناشف
و كوني دواهوالجرح النازف
كوني ضياء النجمات العالية
و هدئ النبض في القلب الخائف
كوني السر جواه و لطائف
بصراً يمتد في الزمن الجايي شفائف
اتحدى معاك
قساوة الزمن الجامح ....عبث الأشواق
جفا الأيام ......منك ما خائف
واترجاك نبعاً يشتاق هاجر تغرف
تسقي اسماعيل ....و الطير يروى
و رحلة تاريخ .....تبدأ بانصاف
ويمتد السيل ......سعى و طواف
و يمتد النور يبلغ ......آلاف
و الامن الكان لقريش ......إيلاف
تمتد فروعه
لا فيها حزين ...لا رياح ...لا نو.... ولا من خاف
الزلفى ....الزلفى ...إيلاف .....إيلاف
يا امن الخائف
و القاك يمين اكون واثق
الاقي خطاك
اجيك حافي .....اجيك حالق
وناذر عمري للافراح
اجيك حالف ....اكون صادق
مواعيدك ....اعاهدك تاني ما افوتها
اسير جنبك خطاى خطاك لا تفوتها
أنا المسكون ....و كل الكون ....عرف ذلك
هواك ......جنون
ضراك .......جنون
معاك .......جنون
بلاك .......جنون
و ليك .....متون
هواك .....أتون
و فيك ....فتون
و بيك ...مفتون
وأنا المجنون....و عاشق أنثى ياقوتة
وأنا المجنون.....و عاشق أنثى ياقوتة
......... ....... ........
قطار نيالاـ1998

نتمنى يرجع الامن لغربناالحبيب عندى صديقتى من نيالا ودايما تحكى عن جمالها وشفت صوركمان فعلا روعه وناس طيبين
مزيد من الابداع